Ginpahayag sang resident Volcanologist sang Kanlaon Volcano Observatory sa La Carlota City, Negros Occidental nga ang mga nagaluntad nga ash emissions sang Bulkan Kanlaon ang nagapakita nga nagasaka ang magma.
Sa interview sang Bombo Radyo Bacolod kay Mari-Andylene Quintia, ang mga ash emissions ang mahimo tuga sang magma nga nagasaka na sa surface sang bulkan.
Suno kay Quintia, nagadamo naman ang nadetect sang sensors sang Philippine Institute of Volcanology and Seismology (PHIVOLCS) nga volcanic tremors kag ginaupdan sang ash emissions.
Suno diri, nagbaskog na ang mga aktibidad sang nasambit nga bulkan bangud may yara na san detection.
Sa nakaligad nga 24 oras, nakarekord sang walo ka ash emission activities ang Bulkan Kanlaon.
Narecord man ang 30 volcanic earthquakes kalakip na ang pito ka mga volcanic tremors nga naglawig sang anom tubtob 28 ka minutos.
Nagbuga man ang Bulkan sang 2,964 ka tonelada sang sulfur dioxide.
Padayon man ang ash emissions kag pagsungaw sini na nagdangat sa 750 metros ang kataason sini.
Ginapaaligmat sagihapon ang publiko sa posible nga paglupok sang Bulkan.
Nagapabilin sa gihapon sa alert level 3 ang Mt. Kanlaon.
Una na nga ginpahayag sang Office of Civil Defense nga ang mga evacuees ang ginhatagan sang window hour agud nga makasaka sa 6km extended danger zone agud nga makaatipan sang ila mga pananum kasubong man ang ila mga kasapatan.
