Nagapadayun ang medication ni Tiktok, ang aspin nga gintiro sang Indian Target sa Barangay Blumentritt, Murcia.
Sa interview sang Bombo Radyo Bacolod kay Dr. Aron Pabalon sang Juan Veterinarian – Bacolod City, isa sa mga veterinarian nga nagsurgery kay Tiktok, maayo ang gana sang Aspin sa pakaon apang may-ara gihapon sang kabudlayan sa paglakat.
Paathag sini nga bangod sa mga pilas tuga sang Indian Arrow, nakaangkon sang mga muscle injury ang ido kag magadangat pa sa anom tubtob 18 ka semana ang recovery sini.
Suno kay Dr Pabalon, ipaidalom pa si Tiktok sa rehabilitation program agud magbalik ang function sang iya kamot.
Ginhatagan man nila ini sang antibiotics, kag bulong para sa external parasit kag pain medication samtang ini ang ginpaidalom man sa laser therapy agud magdasig ang pag-ayo sang pilas.
Suno diri, ang BACH Project kag PAWssion Project ang masami nga nagadala sa ila sang mga narescue nga kasapatan agud ipabulong.
Pahayag sini nga karun lamang sila nakabatun sang kaangay nga kaso gikan sa banwa sang Murcia.
Suno diri, kun wala gilayon narescue sang BACH Project si Tiktok, ang ila ginakahangaw-an amo ang posibilidad sang tetanous nga kun maglala mahimo magresulta sa amputation ukon pag-utod sang bahin sang lawas nga infected.
Sa pagtsek nila sang unto, ginabanta nga isa ka tuig pa lamang si Tiktok ukon wala pa magdangat sa 2 years old.
Ang gastos sa mga bulong, laser therapy kag rehabilitation program para kay Tiktok ang ginabanta magadangat sa P20,000 tubtob P30,000.
Apang paathag sini nga may arrangement ang BACH kag Juan Veterinarian – Bacolod, gani ang serbisyo sang veterinary clinic ang discounted.
Luyag naman nga athagon ni Dr Pabalon ang sala nga paghangop nga kun madala sa veterinary clinic, segurado na ang pag-ayo bangod may mga balatian nga indi na nila masarangan.
Apang ang ila lamang nga mapasalig nga ginatinguhaan sang mga veterinarian nga mabalik sa normal ang mga pasyente nga kasapatan.
Suno diri, sa animal cruelty cases, sila ang makabatun sang duha tubtob tatlo ka biktima nga kasapatan sa kada semana, nga ginadala sang nagakalainlain nga animal rescue organization.
