Generally peaceful ang assessment sang Bacolod City Police Office sa pagsaulog sang paskwa kag bag-ong tuig.
Sa interview sang Bombo Radyo Bacolod kay Police Lt. Col. Ronnie Brillo, commander sa Bacolod City Mobile Force Company, sa ila nga pagbantay humalin Desyembre 16 tubtob subong nga Enero 2, wala sang narecord nga insidente may kaangtanan sa New Year’s Day celebration magluwas lamang sa pito ka firecracker-related incidents.
Suno diri, may pito ka mga nabiktima sang palupok nga ginalakipan sang lima ka menor de edad kag duha ka legal age.
Kalabanan suno kay Brillo ang nakaangkon sang eye injuries kag slight burns kag kadam-an sa mga kaso ang bangod sa boga.
Ginapanawagan man sang mga kapulisan sa mga pumuluyo nga may nabilin pa nga palupok nga ini ang idispose na lamang, kaangay sa pagbasa sang tubig ukon paglubong sa mga ini.
Ginapasalamatan man sang BCPO ang tanan nga mga Bacolodnon sa pagkooperar sa matawhay kag malinong nga New Year’s Eve celebration.
