Generally peaceful man ang assessment sang 3rd Infantry Division sang Philippine Army sa natapos nga selebrasyon sang paskwa kag bag-ong tuig.
Sa interview sang Bombo Radyo Bacolod kay Lt Col. J-jay Javines, pinuno sang Division Public Affairs Office sang 3rd Infantry Division sang Philippine Army, wala sang engkwentro nga nagluntad sa ila nga area of responsibility sadtong ginselebrar ang paskwa kag pagsug-alaw sang bag-ong tuig.
Suno diri, wala man sila sang mga reported nga biktima sang firecrackers ukon stray bullets, ini bangod nga hugot ang ila pagpatuman nga wala sang ano man nga armas-luthang ang dapat nga ipalupok sa Christmas kag New Year celebration.
Ginalauman naman sini nga madismantle na ang ulihi nga aktibo nga grupo sang New Peoples Army nga amo ang Southwest Front sa idalum sang Komiteng Rehiyon Negros, Cebu, Bohol and Siquijor (KR NCBS).
Sa karun ginalauman sini para sa tuig 2024 nga mangin insurgency free ang probinsya sang Negros Occidental kasubong man nga madismantle na ang nabilin nga grupo sang NPA.
