Ginakasubo sang alkalde sang Kabankalan City ang pagtaliwan sang isa ka assistant city engineer sa ciudad sang Domingo bangud sa coronavirus disease.
Sa interview sang Bombo Radyo kay Mayor Pedro Zayco, ginpahayag sini nga nagakasubo sa karun ang ciudad ilabi na ang City Engineer’s Office sa pagtaliwan sang 48-anyos nga assistant city engineer bangud sa COVID-19 sang Domingo, Nobyembre 15.
Suno kay Zayco, ulihi ini nga nakareport sa ubra sang Nobyembre 6 kag nagfile sang isa ka semana nga leave bangud sa iya ginasuprer nga hilanat kag ubo.
Suno sa iya, nagpa-admit ini sa isa ka ospital sa Bacolod apang sang Domingo, ginbawian na ini sang kabuhi.
Ginlockdown naman ang bilog nga departamento sang City Engineer’s Office agud makapatigayon sang disinfection.
Suno sa alkalde, ang nasambit nga empleyado ang may ginasuprer na nga daan nga diabetes kag asthma kag posible nga ini ang nangin komplikasyon rason kun ngaa nadulaan ini sang kabuhi.
Nagapati man si Zayco nga posible sa isa ka barangay kun sa diin may positibo nga kaso sini nakuha ang virus bangud bilang isa ka engineer, exposed ini sa tawo kag sa field.
Ginpahayag man sini nga naga-amat-amat na flatten ang curve sa ciudad kag nagapanawagan ini sang kooperasyon sa mga pumuluyo sa pagsunod sang health protocols kaangay sang pagsuksok sang face mask, face shield, pagpanghugas sang kamot kag pag-obserbar sang social distancing.
