Nahisugtan sang Negros Occidental Association of Chief Executives (Negros ACE) nga ipatuman ang nauna nga guidelines sang national inter-agency task force (NIATF) nahanungod sa pagpauli sang mga returning overseas Filipino nga ipaidalum gihapon ang mga ini sa RT-PCR test kag facility quarantine antes papulion sa ila mga puluy-an.
Sa interview sang Bombo Radyo kay Victorias City Mayor Frederick Wantan Palanca, presidente sang Negros ACE, ginpahayag sini nga nag-apelar sila sang Lunes sa national government nga ibalik ang nauna nga pagsulundan sa pagpapauli sang mga ROF kag magapadala sila liwat sang iban pa nga manifestation.
Suno kay Palanca, wala sila nagadiskriminar sa mga ROF apang kun sa matud-tuod lang nga istorya suno sa iya, nagsulod ang COVID sa probinsya bangud sa mga LSI kag ROF.
Suno diri, magapanindugan gid sila nga indi pwede nga indi pagpaidalum sa RT-PCR test kag 14 days quarantine ang mga ini.
Gindugang man sang alkalde nga himuon nga 14 ka adlaw ang validity sang health certificate sang mga APOR nga nagikan sa mga ciudad kag probinsya nga nagaubra sa isa ka LGU nga nagarequire sini imbis nga isa lang ka adlaw bangud ila naintindihan nga mabudlay ang magkwa sini adlaw-adlaw.
Kinahanglan man suno sa iya nga may yara ipakita nga health certificate ang mga drivers sang truck nga nagasulod sa tagsa-tagsa ka mga LGU.
