Ginpasalamatan sang chairman sang Association of Rice Farmers in Tabunan sa ciudad sang Bago ang suspension sang importasyon sang bugas sa Setyembre apang nagapanawagan ini nga kun tani indi lang sa sulod sang 60 dias ang suspension sang rice importation.
Mahibaluan nga nagmando si President Ferdinand “Bongbong” Marcos Jr. sang suspension sa tanan nga importasyon sang bugas sumugod sa Setyembre 1, 2025.
Sa interview sang Bombo Radyo Bacolod kay Carmelo Gentile, dako nga bulig sa rice farmers ang ginhimo nga tikang sang presidente para makaginansya man ang farmers.
Suno diri, sa latest ang production cost yara sa P13.09 kada kilo apang ginabakal lang ini sa ila sa presyo nga P13 kag pierde pa sila sang P0.09.
Suno diri, kun ang National Food Authority ang mabakal sa ila sang bugas, nagagasto ang farmers sang inugbyahe para diri kag kun kaisa ginareject pa kag gagasto naman sila byahe pabalik samtang kun ang traders naman ang mabakal sila naman ang makaginansya.
Pahayag ni Tabunan, ang mga rice farmers nagakapierde bangod indi sila makakompetensya sa presyo sang imported rice.
Suno pa diri, nagapanawagan siya nga kun tani indi lang sa 60 ka adlaw ang suspension sang rice importation bangod lain-lain ang schedule sang pag-harvest sang humay amo nga iban indi na maka-avail sa benepisyo sang suspension sang rice imporation.
Kaangay na lamang sa bahin sang ciudad sang Bago, sa norte nga bahin mapa-harvest ang farmers sa Setyembre samtang ang sur nga bahin naman mapa-harvest sa Oktubre.
Dugang pa sini, iya ginapanawagan sa Department of Agriculture nga lantawon ang aktwal nga nagakatabo sa farmers kun pila ang ila maginansya kag pila ang ila kapierdehan.
