Ginkompirmar sang pinuno sang Provincial Disaster Management Program Division-Negros Occidental nga nag-abot kaina mga alas 02:15 ang takna sini nga hapon ang COVID-19 Vaccine para sa probinsya sang Negros Occidental nagikan sa Regional Office sang Department of Health-Western Visayas.
Sa interview sang Bombo Radyo kay Dr. Zeaphard Gerhart Caelian, ginpahayag sini nga 99 vials ukon 390 shots sang Sinovac vaccine samtang 74 naman ka AstraZeneca vaccines.
Ginpahayag man ni Caelian nga may yara man nga nag-abot para sa syudad sang Bacolod nga 312 nga AstraZeneca vaccines kag naturn-over naman nila sa syudad sa pagpanguna man sang bag- o nga pinuno sang Bacolod City Disaster Risk Reduction Management Office.
Suno kay Caelian, bwas magasugat naman sila sang dugang nga bakuna para sa probinsya sang Negros Occidental sakay sa Philippine Coast Guard boat apang wala pa mapat-od ang oras sang pag-abot sini sa BREDCO port.
Ginpahayag man sini nga kaina sang aga nangin madinalag-on man ang COVID vaccine simulation program sa mga local government units sa banwa sang Murcia, Negros Occidental kag ginpasalamatan man sini si Mayor Jerry Rojas.
Natalana naman nga deliver nila buas nga adlaw sa Valladolid Hospital kag Kabankalan District Hospital ang COVID vaccine.
Na-una na nga nabaton sang Negros Occidental ang kapin sa 1,600 doses sang Sinovac nagikan sa sobra nga doses sang bakuna nga ginpain para sa syudad sang Bacolod nga gin-gamit na kahapon sa ginpatigayon nga ceremonial vaccination kon sa diin 12 ka mga doctors kag nurses ang una gin-tublukan.
