Ginkumpirmar sang resident volcanologist sang Philippine Institute of Volcanology and Seismology-Kanlaon Volcano Observatory nga may yara sang reported nga nakapanimaho sang asupre sang Lunes sang gab-i, Oktubre 5.
Sa interview sang Bombo Radyo Bacolod kay Mari-Andylene Quintia, ang mga nabaton nila nga reports ang nagikan sa mga residente sang upland Barangays sang La Castellana, Bago City kag La Carlota City.
Suno kay Quintia, mahimo nga nagsaka ang sulfur dioxide emission sang Bulkan Kanlaon kagab-i rason nga napanimahuan ang asupre.
Dugang pa sini nga wala man sang rekorded nga eruptions sang nasambit nga Bulkan kagab-i.
Samtang, ginkumpirmar sang Municipal Disaster Risk Reduction Management Office Head sang La Castellana, Negros Occidental nga pila ka mga barangay ang nakapanimaho sang asupre sang Martes sang aga, Oktubre 6.
Sa interview kay John De Asis, masarangan man sang mga residente ang baho sang asupre gani wala naman sang nag-evacuate.
Suno kay De Asis, gin-abisuhan ang mga ini nga magsuksok sang face masks, magpabilin sa sulod sang balay kag sirad-an ang bintana agud nga mapahagan-hagan ang exposure sa baho.
