Gina-alegar nga konektado kay Atong Ang ang nadiskubrehan nga studio nga naga-operate sang online sabong ukon “e-sabong” sa Sitio Catamnan 2, Brgy Concepcion, Talisay City.
Madumduman nga naaresto ang 30 ka mga indibidwal matapos madakpan nga naga-operate e-sabong sang Abril 23 sa isa ka joint operation nga ginpangunahan sang Criminal Investigation and Detection Group (CIDG).
Nakumpiskar sang mga otoridad ang nagkalain-lain nga mga kagamitan nga ginapatihan ginagamit sa ilegal nga operasyon lakip na ang mga computer set, laptop, router, 26 ka mga cellphone,video camera, tatlo ka Starlink satellite receiver, 290 ka cockfighting gaffs, mga fighting cocks kag iban pa nga may kaangtanan sa online betting kag sabong broadcast.
Suno kay Talisay City Mayor Rowena Lizares, ang farm ang nakasirado kag kaangay nga ordinaryo lang nga breading ground sang mga fighting cocks apang sa sulod may ginatukod na studio para sa e-sabong.
Suno sa Alkalde, ang imbestigasyon sa lugar ang ginsuguran sang nakaligad pa nga Disyembre.
Dugang pa, pareho sa warehouse nga ginarentahan lang posible nga isa si Atong Ang sa mga financers sa amo nga e-sabong.
Nahibaluan nga si Ang ang no. 1 most wanted person sa pungsod bangud gina-alegar nga involved ini sa “Missing Sabungeros”.
Nagapanawagan si Lizares sa mga pumuluyo sang ciudad nga kun may nahibauan nga naga-operate sang e-sabong gilayon nga ireport sa mga otoridad agud ma-aksyonan.
