Ginkumpirmar ni Atty. Danny Pondevilla, project supervisor kag general manager sang Northern Negros Electric Cooperative, Inc. (NONECO) nga gin-appoint siya sang National Electrification Administration bilang project supervisor kag acting general manager man sang Central Negros Electric Cooperative (CENECO) sang Lunes.
Sa interview sang Bombo Radyo kay Pondevilla, ginpahayag sini nga siya ang magauyat sang bilog nga operations sang CENECO kay may yara ini sang gahum nga mag-aprubar ukon magdisapprive sang mga board resolutions.
Aminado ini nga medyo makapoy bangud bangud yara sa Manapla ang opisina sang NONECO kag didto ini nagareport kun aga kag nagapadulong naman ini sa Bacolod pagkahapon para naman sa CENECO.
Suno sa iya, madamo sang isyu sa labor union hiribng kag promotions lakip na ang salary increases, benefits kag mga pamanngkot nahanungod sa hospitalizations kag amu ina ang iya pagatutukan.
Ginklaro man sini sa labor union nga indi tanan nga demand ang mahatag bangud may yara man sang limitasyon gani iya ginabalanse ang interes sang empleyado sang CENECO kag kooperatiba.
Magahimo man ini sang komitiba nahanungod sa hiring kag promotions kun sa diin tanan ang marepresentar kag wala sang pamulitika nga magluntad.
Suno sa acting general manager, makig-angot man siya sa consumer group agud mapamatian man ang ila mga isyu nahanugod sa CENECO.
Sa masunod nga semana, suno kay Pondevilla, isa-isahon sini sapol ang kada departamento kag magfocus sila sa technical nga mga aspeto kag pagatun-an ang power supply.
Nagapangayo man ini sang suporta sa mga konsumedor nga ireport ang mga ireguralidad ukon mga pagpangawat sa kuryente bilang pamaagi sang pagpalangga sa kooperatiba.
