Luyag sang kongresista sang 5th District sang Negros Occidental nga mabatian ang pa-athag sang Sugar Regulatory Administration (SRA) angot sa ginareklamo nga manubo nga presyo sang mill gate price sang kalamay.
Sa interview sang Bombo Radyo Bacolod kay Congressman Atty. Dino Yulo, sang Huwebes tinalikdan nga semana sa ginapatigayon nga bidding yara sa P2,250 ang presyo sang mill gate price.
Suno diri sang tinalikdan nagdangat pa sa P2,700 tubtob P2,800 ang presyo tubtub nga nanaog sa P2,400 kag sa karun nanaog pa gid sa P2,250.
Suno kay Yulo, humalin pa sang nakaligad sila nga nagapanawagan sa SRA nga ipa-athag kun ano ang rason sa pagnubo sang mill gate price kag kun ano solusyon diri.
Dugang pa sini, ang SRA lamang ang makahambal kun ano ang rason, kun bala kulang ukon madamo ang supply kag kun san-o tubtob nga manubo ang mill gate price.
Pahayag sang kongresista, kun magpadayon ang ini nga problema, ini makadugang sa instability sang pungsod nga maka-apekto sa presyo.
Suno pa kay Yulo, tuman ka alarming na ang ini nga pagnubo sang mill gate price bangod ini manubo pa sa production cost kag makalulooy ang mga sugar farmers.
