Sa pagbalik sang Senate Impeachment Trial matapos sang recess para sa lunch break, ginhingyo ni Defense Lawyer Atty Kristine Ferrer sa Senate Impeachment Court nga indi pahanugutan ang mga side comments kag iban pa nga maka-insulto nga komento sa sulod sang korte.
Ini angot sa pila ka mga side comments ni Private Prosecution counsel Atty Lorna Kapunan tuhoy kay Ferrer nga nacapture sa livestream sang impeachment trial sa ika-15 nga adlaw.
Panindugan ni Ferrer nga apisar mas malaba ang experience ni Kapunan sangsa iya, wala sang lugar ang ano man nga side comments sa sulod sang korte, sa baylo dapat nga respetuhon ang kada isa.
Suno diri, parehas lang sila nga abogado ni Kapunan, gani dapat respetuhon man ini sang iya kaangay nga counsel.
Ginklaro naman ni Senate Trial Presiding Officer Chiz Escudero nga ginbawi na ni Kapunan ang komento, kag apisar nga ini ang naggwa sa livestream, ini ang ginstrike-out sa Senate records.
Madumduman nga naglahog si Kapunan nga ginapunggan lamang sini ang iya kaugalingon nga bakulon si Ferrer, nga himuon niya kun may ara sang generational divide.
Nagpasalig naman si Kapunan nga maga-behave na ini sa pagpadayun sang trial.
