Aminado ang political analyst nga may punto si former President Rodrigo Duterte sa indi pagtambong sa House Quad Committee Hearing bangod ang pamangkot ang pasulit-sulit na lamang.
Sa interview sang Bombo Radyo Bacolod kay Atty. Jomax Ortiz, nakahatag na sang malawig nga speech si Duterte sa Senate Hearing kag nasabat naman ang mga pamangkot.
Ini ang nakuhaan na sang transcript of records nga sarang mapadala sa International Criminal Court (ICC).
Dugang pa sini nga may admission na ang anay Presidente sa pila ka mga akusasyon gani wala na sang rasun agud pahanugutan sini nga siya ang liwat nga gisahon ukon ibarbeque sang mga kongresista.
Para sa abogado, indi mahimo nga icontempt sang Quadcom si Duterte bangod ini ang nakatambong naman sa nauna nga mga hearing.
Sa pihak sini, pahanumdom man ni Ortiz nga Senado man ukon Kongreso, dapat nga pinsaron nga ang resource speaker ang indi normal nga persona kundi anay Presidente sang pungsod nga dapat hatagan sang pagtahod.
Suno diri, kun icite in contempt sang Quadcom ang anay Presidente, ini ang makabig na nga pag-abuso sang puder.
Aminado man ini nga sala ang proseso sang mga mamalidha bangod mahimo man nga magpatigayon sang joint hearing ang Senado kag Kongreso.
Pahanumdom sini nga mas mataas ang Senado sa Kongreso kag sa kaangay nga issue, indi pwede nga napatawag na sa Senado ipatawag pa liwat sa Kongreso.
Ini ang mapaanggid sa pagpatawag sang Korte Suprema, nga indi na nagakaangay nga ipatawag pa sang Court of Appeals kun parehas lamang ang issue nga ginatalakay.
Panugyan sini sa mga kongresista nga indi magpadala sa emosyon bangod sila ang ginapiyestahan na lamang sang mga vloggers.
Suno diri, ang nagakatabo ang kaangay nga padayaw ukon grandstanding kag libre nga pagpangampanya na lamang sang mga mamalidha para sa masunod nga eleksyon.
