Natunga ang reaction sang isa ka abugado sa syudad sang Bacolod sa hagna nga ginaduso ni Senator Robinhood Padilla nga I-legalize ang marijuana sa Pilipinas apang gamiton bilang bulong.
Sa interview sang Bombo Radyo Bacolod kay Atty. Jomax Ortiz, ginpahayag sini nga pabor siya sa hagna nga ginaduso sang bagito nga senador apang nagakahangawa man ini bangud mahimo gid maabusuhan sa tion nga mapasar kag mangin layi na ang hagna.
Suno kay Ortiz, sa Pilipinas illegal ang marijuana sa idalom sang layi nga RA 9165 ukon Comprehensive Dangerous Drugs Act of 2002.
Suno sa abugado, sa bug-os nga kalibutan napulo pa lang ka mga pungsod ang naglegalize sang marijuana, ini ang ginalakipan sang Lesotho; Netherlands; South Africa; Canada; Colombia; United States kun sa diin ginapahanutugan sa 19 ka estado ang paggamit sang marijuana bilang bulong; Rwanda; Morocco; Uruguay kag Jamaica.
Ang marijuana ang scientifically nga napamatud-an nga ini ang makabulong sa pila ka mga balatian.
Suno kay Ortiz, pananglit nga maaprubahan ang hagna dapat dulaon sa provision ang cultivation ukon pagtanom bangud mabudlay na ini ikontrolar sa tion nga maumpisahan.
Suno diri dapat ang gobyerno ang magabutang sang isa ka cultivation area kag dapat ang sa idalom man sa gobyerno agud mamonitor kun sin-o nagakuha kag sa diin ginadala ang marijuana bangud kun sa pribado dako gid nga posibilidad nga ini maabusuhan.
