Nagalaom ang abogado kag anay konsehal sa Bacolod City nga mapasar bilang layi ang Anti-Dyasty Bill antes matapos ang Marcos Administration, karun nga ini ang ginlakip sa priority bills.
Sa interview sang Bombo Radyo Bacolod kay Atty Renecito Novero, halin sang natukod ang 1987 Constitution, karun lamang nahatagan sang pagtamod ang problema sa political dynasty sa Pilipinas.
Nahibaluan nga yara sa Article 2 Section 26 sang Akta Republika nga dapat maghatag sang patas nga oportunidad sa public service kag ginadumilian ang political dynasty.
Apang ini ang wala man ginapatuman bangod sa kakulangan sang maathag nga kahukugan sa makabig nga political dynasty.
Suno kay Novero, nagalaom ini nga mapasar bilang layi ang hagna antes magpanaog si President Ferdinand “Bongbong” Marcos Jr. sa 2028, ilabi na karun nga ini ang iya gincertify nga priority bill.
Aminado ang abogado nga wala pa sini mabasa ang kaundan sang hagna, apang nagalaom ini nga nalakip diri ang definition sang matawag political dynasty.
Suno kay Novero, mas maayo nga maplastar man ang pagdumili sang tubtob sa magpakaisa, apang mas pabor pagid kun tubtob sa 4th civil degree ukon pakatatlo ang pagdumili nga makasulod sa politika gikan sa isa ka pamilya.
Aminado si Novero nga madamo sang pamilya nga ginkabig na nga palangabuhian ukon source of income ang pwesto sa panggobyerno.
Para sa iya makabig na nga kurapsyon ang politikal dynasty nga makita man sa pila ka politiko sa Negros Occidental.
Nagalaom ini nga kun mangin layi, ini ang ipatuman gikan sa highest level ukon sa Presidente panaog sa Barangay level.
Ang pagpasar sa hagna sa bahin sang House of Representative kag Senado ang makapakita man sang sensiridad sang mga incumbent nga mamalidha nga miyembro sang political dynasty.
Para kay Novero, makabig na nga kurapsyon ang pagsulod sang mga miyembro sang isa ka pamilya sa nanarisari nga pwesto, nga nagapakita nga luyag sang mga ini sang monopolya para sa personal nga interes.
