Ginpanawagan ni Atty Salvador Panelo, former Chief Presidential Legal Counsel sang Duterte Administration nga untaton na sang Marcos Administration ang pagtarget kay former President Rodrigo Duterte kag Vice President Sara Duterte.
Sa interview sang Bombo Radyo Bacolod kay Panelo, maathag na nga bagsak ang administrasyon sa paghatag sang solusyon sa panginahanglanon sang mga Pilipino.
Ini bangod man sa mga wala nagatrabaho ukon pigaw nga performance sang pila sa mga Cabinet Secretaries.
Dugang pa ni Panelo nga nagnubo man ang trust ratings ni President Ferdinand “Bongbong” Marcos Jr. humalin sang illegal nga ginpa-aresto kag gindala sa International Criminal Court si former President Duterte.
Ang pigaw nga performance kag manubo nga trust ratings naman ang nagduso kay Presidente Marcos nga magpatawag sang courtesy resignations sa mga Cabinet Secretaries bilang loyalty check sa iya administrasyon.
Agud indi tuman kasakit ang himuon sini nga pagpamalos sang yara sa pwesto, gintago nalang sa pagbalasa sa pwesto.
Suno diri, dapat nga ipakita ni Marcos nga siya ang indi weak leader.
Pahanumdom ni Panelo nga pamatuod ang resulta sang May 12 Elections nga akig ang mga tawo sa ginahimo nga persecution kag retribution ukon pagdumot kag pagbalos sa mga Duterte.
Suno diri, ang balota ang gingamit nga palaagyan sang mga pumuluyo agud ipabatyag nga sila ang akig sa illegal nga pag-aresto kag pagbayolar sa tawhanon nga kinamatarong ni former President Duterte.
Panawagan sini nga untaton na ang pagpamigos kag pagbalos sa mag-amay nga Duterte, kag mas tuonan sang atensyon ang problema sang pungsod.
