Luyag sang election officer sa Bacolod City nga may madakpan nga nagapatigayon sang vote buying agud mangin example sa iban nga kandidato.
Sa interview sang Bombo Radyo Bacolod kay Atty Revo Sorbito, bisan ano pa ang ihatag sang kandidato sa tawo kaangay sang t-shirt, kuyab, lighter, tubig ukon iban pa, ini ang makabig na nga vote buying.
Suno diri, indi man nila mamonitor ang tanan apang ila man ginatinguhaan nga kun may yara sang mga activities ang mga kandidato sila ang nagapartisipar gid.
Nagapanawagan si Sorbito nga kun may yara man sang makakita nga may vote buying ukon vote selling dapat nga ireport ini.
Suno kay Sorbito, madugay na nga nagakatabo ang baklanay sang boto apang wala man nagakadakpan bangod wala man sang may nagareklamo.
Paandam sini nga kun sila mismo sa COMELEC ang maka-akto nga may nagahimo sang election offense, mahimo nila nga madakop gilayon ang kandidato.
Pahayag ni Sorbito, dapat nga may madakpan gid agud mangin serbe bilang example sa iban nga maghalong kag mapakita nga seryoso ang COMELEC nga matapna ang vote buying.
