Gin-athag sang former chief legal counsel ni ex-president Rodrigo Duterte nga wala sang ano man nga suhol nga ginhatag ang anay presidente sa pagpatigayon sang war on drugs.
Sa interview sang Bombo Radyo Bacolod kay Atty Salvador Panelo, may yara sang operational fund nga ginahatag sa Philippine National Police sa pagpatigayon sang imbestigasyon kag operasyon sa pagdakop sa mga may sala.
Suno diri, kun may yara sang sobra sa pondo ginahatag na lamang ini sa mga kapulisan bilang award sa ila achievement.
Ginpa-athag sini nga ang ginahambal nga reward system ang wala sang kamatuoran bangod kun reward ang ginahambal, ini ang nagakahulugan nga may kwarta nga ginhatag para magpatay sang tawo samtang,ginpahayag ni Atty Salvador Panelo, former chief legal counsel ni ex-president Rodrigo Duterte nga kun sin-o man ang luyag nga magpasaka sang kaso batok sa anay presidente nga magiho na samtang sila ang magatrabaho man nga ipakigbato ang ila bahin.
Sa interview sang Bombo Radyo sa abogado, wala na sang jurisdiction ang International Criminal Court (ICC) sa pag-imbestigar kay Duterte bangod nag-withdraw na ang Pilipinas sa ICC kag matapos ang isa ka tuig sang withdrawal, amo pa lang nga ginpagwa nga magatrabaho ang ICC sa imbestigasyon.
Apang kun may yara man sang jurisdiction ang ICC bangod sa treaty, nakabutang lamang nga makasulod sila sa pungsod nga yara sa ila miyembro kun wala sang sarang ang pungsod nga mag-imbestigar sa natabo nga crime againts humanity ukon may yara man sang kasarang apang wala man naggiho.
Pahayag ni Panelo, wala sang problema sa anay presidente nga mag-attend sa House Quad Committee hearing bangod nga natak-an na ini sa mga ginahaboy nga pagpangguba sa iya apang pag-abot na sa hearing halos sulit-sulit lamang ang mga pamangkot.
