Ginlatag ni former chief presidential legal counsel Atty Salvador Panelo ang lima ka ginalantaw sini nga plano sang administrasyon agud lamang mapunggan si Vice President Sara Duterte nga makapapili sa Presidential Election sa 2028.
Sa interview sang Bombo Radyo Bacolod kay Panelo, sa una nga tikang, ginpakasuhan sang administrasyon ang mga Senador nga nagasuporta kay VP Sara, partikular na ang mga maathag nga magaboto para sa acquital sang impeachment case.
Ini ang nagaserbe man nila nga pamahog sa mga Senador agud magsaylo sang kampo, kag makuha ang kinahanglan nga 16 ka boto.
Ang ikaduha amo ang pagfile sang grave threat charges batok sa Bise Presidente.
Suno diri, ang grave threat ang ginpasaka sang duha ka lebel paagi sa cybercrime law, gani ang kuntani penalidad sa conviction nga prison correctional lamang ang nagsaka naman sa reclusion temporal.
Kalakip sa accessory panelty sini ang disqualification nga makakapot sang ano man nga pwesto sa gobyerno.
Bangod nakita nga kaangay nga mapaslawan ang una nga duha ka paagi, diri naman nagsulod ang ikatatlo nga tikang sang administrasyon, nga pagbag-o na sang conviction threshold.
Paagi sa mga nauna nga tikang nga nagtuga agud indi makatambong sa trial ang pila ka mga Senador nga kaalyado ni VP Sara, ginduso nila nga ang makabig two-thirds nga kinahanglan para sa conviction ang mabase sa mga Senador nga present sa hearing.
Bangod sa pagbuhin sang apat, mangin 20 na lamang ang working Senators gani ang two-thirds ang mahimo mapanubo sa 13 ka boto.
Samtang ginpakasuhan naman ang mag-utod nga Villar, gani balantayan pa ang masunod nila nga tikang, kun sila ang magapalagyo ukon magasaylo man sa pihak nga kampo.
Kun indi pagid mangin madinalag-on, diri na magasulod ang ikaapat nga pamaagi.
Kun sa diin magapadulong ang mga luyag nga mapukan si VP Sara kay President Ferdinand Marcos Jr. para sa emergency rule.
Kun sa diin ayuon nila sa Presidente ang pagdeklarar na sang martial law, agud mapaiway ang eleksyon.
Sa pihak sang mga tikang kun indi pagid mangin madinalag-on, nagapati si Panelo nga ang ulihi na lamang nga paagi agud mapunggan si VP Sara nga magpapili, amo ang pagpapatay diri.
Una na nga tikang suno diri amo ang pagkakas sang personal security sang Bise Presidente.
