Nagapati ang Executive Vice President sang BAYAN MUNA nga wala na sang nagakaigo nga popularidad si US President Donald Trump para madissolve ang International Criminal Court.
Ini kasunod sang panawagan ni Trump sa mga ICC-member state nga magwithdraw na sa ICC.
Sa interview sang Bombo Radyo Bacolod kay Atty Carlos Isagani Zarate, ang America ang wala gid nagpirma agud mangin miyembro sang Rome Statute.
Ini bangod ang America ang makabig aggressor sa bilog nga kalibutan, nga amo ang sponsor sa kadam-an nga gyera.
Bangod sa mga war crime nga nakumiter, nagapati si Zarate nga nahadlok si Trump nga siya, kag ang US military forces ang mapasakaan sang kaso sa ICC.
Hugot nga nagapati si Zarate nga indi mabungkag ni Trump ang ICC, bangod ini ang madugay na nga ginapanawagan sang US President, apang wala man nagakatabo.
Suno diri, napugday na ang impluwensya ni Trump bangod sa indi husto sini nga mga patakaran, kag bagsak naman ang ila nga ekonomiya.
Dugang pa sini nga bangod sa pagbayolar ni Trump sa ceasefire deal sa Iran, mas nagnubo nagid ang pagtan-aw sa iya.
Suno diri, mga civilian target na ang gina-igo sang US forces kag indi mga military targets, kaangay sang mga energy facility, kag taytay sang Iran.
Nagapati ini nga wala sang dako nga impact ang panawagan ni Trump.
Sa pihak sini, panawagan ni Zarate sa Marcos Administration nga magbalik na sa Rome Statute.
Ini bangod ang mga opisyal nga indi mapapanabat sa domestic court kaangay ni former President Rodrigo Duterte ang sa ICC lamang mapapanabat.
Nagapati si Zarate nga matapos ang termino ni Trump, siya ang mangatubang man sang kaso sa ICC, kasubong man si Israeli Prime Minister Benjamin Netanyahu.
