Pagadiskusyunan pa kun magapatigayon sang total rennovation ukon irepair lamang ang nakit-an nga gubaon nga atup sa fish section sang Libertad Public Market.
Sa interview sang Bombo Radyo Bacolod kay Councilor Celia Flor, chairperson sa Committee on Markets, madugay na ang nasambitan nga problema apang sang siya ang magrequest, ginsuhestyon lamang nga gamiton ang ginpull-out nga atup gikan sa Bacolod Central Market.
Nakita mismo sang Bombo News Team nga ang sin nga gingamit ang madamo na sang buslot sang lansang gani mahimo malutsan sang tubig sa tion sang tig-ululan.
Dugang pa nga mahimo makatuga sang short circuit inkaso malab-ot ang mga wirings sang kuryente.
Aminado si Flor nga may gintalana nga P50 million nga budget ang nakaligad nga administrasyon apang ini ang gintunga sa Libertad Public Market, Bacolod Central Market kag Burgos Public Market.
Kun sa diin ang outer structure lamang sang merkado ang ginrennovate kag wala nalab-utan ang interior.
Suno sa konsehal, kuntani gintingob nalang ang budget sa isa ka merkado agud bisan paano mabatyagan ang pagtahom sang merkado.
Sa masunod nga semana, pagatsekyaron pa sini kun kinahanglan na nga magrequest sang total rennovation, kalakip na ang drainage system kag septik tank ukon tapal-tapalan lang anay ang problema.
Paathag ni Flor nga ang market supervisor ang kinahanglan nga maghimo sang letter of request kaupod ang program of work kag ini ang ipasa sa Bacolod City Engineer’s Office.
Ang budget ang magagikan sa trust fund sang merkado.
