Magapangatubang sang kaso nga kidnapping ang duha ka mga persona lakip na ang isa ka Australian national matapos ginkidnap ang duha ka mga menor-de-edad sa ciudad sang Dumaguete kag gindala diri sa Bacolod.
Sa interview sang Bombo Radyo kay Police Major Jun Ray Batadlan, station commander sang Bacolod Police Station 4, nadakpan ang mga suspetsado nga sanday Peter Lay, 39 anyos, anay karelasyon sang iloy sang mga kabataan kag Edlyn Gelantagaan, 25 anyos, nga amu ang yaya sang mga ini, sa Block 3, Lot 11, Camelot Village, Barangay Estefania.
Ang amay sang mga bata ang nangin karelasyon sang iloy antes paman sini nakilal-an si Lay.
Suno kay Batadlan, sang yara pa sa Dumaguete ang mga kabataan, nagapakig-angot ang foreigner kay Gelantagaan kag didto niya nahibaluan kun diin ang mga ini kag gindala sila sa Bacolod City.
Suno diri, nahibaluan naman sang iloy nga yari sa ciudad ang iya mga kabataan bangud man kay Gelantagaan nga nagahatag man sang impormasyon diri.
Kahapon, natigayon nga natultulan ang ila ginatiniran kag nabalik ang mga bata sang kustodiya sang ila iloy.
Yara naman sa Dumaguete City Police Station ang duha ka mga suspetsado kag natalana nga pasakaan sang kaso.
