Ginahingyo ni Negros Occidental Governor Eugenio Jose “Bong” Lacson sa mga airline companies nga i-blacklist ang tatlo ka mga authorized persons outside residence (APOR) nga wala gid nagpaidalom sa swab test sang maka-abot sila sa Bacolod Silay Airport nagligad nga Setyembre 15.
Madumduman nga may pito ka mga APOR ang ginaalegar nagpamalibad nga magpakuha sang swab test apang nalocate na ang apat ka mga personnel sang DC Aquino Land Surveying Services kun sa diin nakuhaan na sang RT-PCR test kag nakaquarantine sa hotel samtang wala gid naka-paswab test ang tatlo ka mga empleyado sang Pax Cable Inc. kun sa diin nakatinir sila sa Bacolod City sang apat ka adlaw antes nagpauli.
Sa interview sang Bombo Radyo Bacolod kay Lacson, ginpahayag sini nga iya gina-request sa mga airline companies nga i-blacklist ang tatlo ka mga empleyado sang amo nga kompaniya agud indi sila makasulod sa Negros Occidental pananglitan nga magbalik pa sila.
Magluwas dira, magapadala man sang sulat ang gobernador sa kompaniya sang tatlo agud ipahibalo nga kun mapadala sila liwat sang mga empleyado sa probinsya ukon sa ciudad sang Bacolod apang maga-agi sa paluparan sa Silay City nga sakop sang jurisdiction sang provincial government, dapat gid sila magsunod sa mga protocol ilabi na ang pagpaidalom sa swab testing.
Kun luyag naman sang mga ini nga magbalik sa Bacolod apang ini magpa-swab test, panugyan ni Lacson nga magsakay nalang sila sa barko agud diretso sila nga madungka sa Bredco Port.
