Suspended sagihapon ang byahe sa tanan nga seaport sa Negros Occidental kasunod sa signal warning nga yara sa signal no. 1 ang probinsya.
Sa interview sang Bombo Radyo Bacolod kay Commander Jansen Benjamin, Commander sang Coast Guard Station-Northern Negros, automatic nga wala sang byahe basta may yara sang signal warning.
Suno kay Benjamin, padayon nila nga ginabantayan ang weather update kag kun malift na ang Storm Signal mapasugtan naman ang pagpadayon sang biyahe sang mga sea vessels.
Suno diri, wala naman sa karun sang narecord nga casualties ukon maritime incidents kag nagalaom nga magpadayon tubtob nga makagawa sa Philippine Area of Responsibility (PAR) ang Bagyong Kristine.
Sa report sang Coast Guard may kabug-usan nga 221 ka mga pasahero sa Negros Occidental ang stranded; 122 ka rolling cargoes kag 16 ka mga passenger vessel.
Padayon naman ang pagpanugyan ni Benjamin sa mga may plano nga magbyahe mas maayo nga magbantay sa weather forecast agud nga indi mastranded kag sa mga mananagat naman, mas maayo nga ipa-iway ang pagpanagat bangod sa makusog nga pagbalod.
Samtang on standby naman ang Coast Guard sa pagresponde kun kinahanglanon sa mga nabahaan bangud sa Bagyong Kristine.
