Tinutuyo sang Bacolod City Disaster Risk Reduction Management Office kag Department of Science and Technology – Philippine Atmospheric, Geophysical and Astronomical Services Administration (DOST-PAGASA) nga magbutang sang siyam ka Automatic Rain Gauge kag pito ka mga water level monitoring sa ciudad.
Sa interview sang Bombo Radyo Bacolod kay Dr. Anna Maria Laarni Pornan, pinuno sang Bacolod CDRRMO, ginpresentar na nila kay Bacolod City Mayor Greg Gasataya ang ila plano sa ginpatigayon nga meeting sang Martes.
Suno kay Pornan, nagpatigayon sang inspection sa rain gauge apang ginpang-pull out ini matapos nga mahibaluan nga indi na mahimo nga marehabilitate.
Suno diri, ginpadulungan sang team ang Barangay Alangilan kag nagdala sang VHF radio agud testingan kun makalab-ot ang signal bangud radio frequency ang ila gamiton sa baylo nga sim card.
Ang Automatic Rain Gauge ang ibutang sa Barangay Alangingilan, Barangay Felisa kag iban pa.
Ang ARG ang ginagamit agud nga mamonitor kun ano kadamol ang ulan sa ibabaw nga bahin sang ciudad agud nga makahimo gilayon sang tikang antes pa man magluntad ang pagbaha samtang ang water level monitoring ang mangin giya naman sa sitwasyon sa mga suba kag mga sapa sa tion nga mag-inulan.
Ang pag-install sang ARG kag WLM ang isa pa lamang ka proposal sang CDRRMO kag DOST-PAGASA sa city government.
