Ginpaidalom na sa autopsy examination ang lawas sang siyam ka tuig nga bata nga babayi nga napatay matapos ginlampusan sang bato kaupod ang duha niya ka mga utod sa Hacienda Badiang, Brgy. E. Lopez, Silay City sang Pebrero 7.
Ini matapos nga nagpasugot na ang iya amay nga ipaidalom ini sa autopsy examination kaina sang aga.
Bangud sini, gindala sa punerarya ang bangkay ni Desiree agud didto patigayunon sang medico-legal officer ang autopsy examination.
Nahibaluan nga ginhaya na kuntani kahapon sa ila balay si Desiree.
Sa interview sang Bombo Radyo sa amay na si Edmund Bornales, wala ini una nagpasugot nga ipa-autopsy pa ang bangkay ni Desiree bangod nalooy na ini sa sitwasyon sang bata.
Suno diri, nagdesisyon ini nga ipa-autopsy na lang ang bangkay bangud mahimo nga may makuha pa nga impormasyon nga makabulig sa imbestigasyon.
Samtang, wala pa sa karun nakapadulong sa punerarya ang asawa sini nga si Ronelyn Montaneiz Ansiano bangod nagatinir ini sa ospital agud bantayan ang duha nila ka bata nga padayon nga ginabulong.
Ang 15 anyos nga babayi ang indi pa gid man mabaskog apang ang 4 anyos nga lalaki ang mapagsik na.
Samtang, nagapasalamat naman si Bornales sa tanan nga bulig nga nabaton sang ila pamilya.
Kaina sang aga, ginturn-over kay Bornales ang P60,000 nga donasyon nga gikan kay Felisa Cubia, tumandok sang Brgy E. Lopez nga yara sa karun sa luwas sang pungsod.
