Away sa duta ang ginalantaw nga motibo sa pagluthang-patay sa 33 anyos nga mangunguma sa Sitio 5, Barangay 11, Gawahon, Victorias City, Negros Occidental kahapon.
Ang biktima ang ginkilala lamang nga si Alyas Jonhee, residente sa nasambitan nga lugar.
Sa interview sang Bombo Radyo Bacolod kay 1st Lt. Dan Carlo Samoza, civil military officer sang 79th Infantry Battalion sang Philippine Army, yara sa covered court malapit lamang sa Barangay Hall ang biktima sang ini ang ginpalapitan kag hinali nga ginluthang sa ulo kag lawas sang tatlo ka armado nga persona.
Sa imbestigasyon, nahibaluan nga may away sa duta sa tunga sang biktima kag sa utod sini, nga sa karun ginakonsiderar naman nga person of interest.
Wala man ginadula sang militar ang posibilidad nga naghire ang utod sini sang New People’s Army agud maghimo sang krimen, bangod ang mga rebelde ang masami nagatrabaho man bilang gun for hire.
Aminadi si Samoza nga may mga katapo ukon supporters pa sang dismantled Northern Negros Front sa nasambitan nga area.
