Nagapadayon pa ang imbestigasyon sang Bacolod Police Station 10 sa kaso sang pagtiro-patay sa lalaki sa Purok Zone 1, Barangay Handumanan, Bacolod City sang Miyerkules sang Hapon.
Ginkilala ang biktima nga si Arnold Caballes, 37 anyos, tumandok sa ciudad sang Kabankalan apang siyam ka tuig na nga nagapuyo sa Purok Ilaya, Barangay Cabug, Bacolod City upod sa iya live-in partner kag kabataan.
Sa interview sang Bombo Radyo Bacolod kay Police Captain Glenn Montaño, station commander sang Bacolod Police Station 10, personal grudge ukon pagdumot ang ginatutukan nga motibo sa pagpatay sa biktima bangud may yara ini sang nakaaway nga may kaangtanan sa transaction sa negosyo sini nga tanum.
Suno diri, ginaid-id sang mga ini ang imbestigasyon agud nga matumod gid ang suspetsado nga ila na nga ginatumod sa karun.
Ginatumod man sang mga kapulisan kun may yara pa sang mga kaupdanan ang ginalantaw sang mga ini nga suspetsado sa pagpatay sa biktima.
Ginareview na sang mga kapulisan sang Bacolod Police Station 10 ang CCTV kun sa diin nakita ang ginalantaw nga suspek kag ang ginmaneho sini nga motorsiklo agud magpalagyo.
Nagpasalig man si Montaño nga ang Bacolod Police Station 10 ang ginahimo ang tanan agud nga mahatagan sang hustisya ang kamatayon sang biktima.
