Away sa tunga sang maglive-in ang una nga ginalantaw nga motibo sa pagtiruhay nga nagpatay sa negosyante nga babayi samtang kritikal naman ang anay Punong Barangay sa Bago City kagab-i sa Bangga Tomaro, Brgy. Sum-ag, Bacolod City.
Sa interview sang Bombo Radyo Bacolod kay Police Captain Andy Ofalia, station commander sang Bacolod Police Station 9, gilayon sila nga nagresponder matapos makabatun sang report nga may pagtiniruhay nga nagluntad, kag ila nga naabtan ang Nissan Navarra nga may pila ka buslot sang bala.
Samtang yara sa sulod ang duha ka biktima nga sanday Carmelita Davila nga yara sa passenger seat kag ang driver nga si anay Punong Barangay Federico “Bimboy” Gayagas Jr. sang Barangay Bacong, Bago City.
Si Carmelita ang may igo sang bala sa nawala nga kilid nga gintunaan sang iya kamatayon samtang si Bimboy ang may igo naman sa natuo nga agtang nga naglapos sa nawala, kag sa karun yara sa Intensive Care Unit (ICU) sang ospital.
Sa umpisa, ginpinsar nga ambush ang natabo, apang sa trajectory investigation sang Scene of the Crime Operation (SOCO), natumod nga gikan sa sulod sang salakyan ang bala.
May narecover man nga tatlo ka armas sa salakyan, isa ka M16 rifle nga yara sa idalom nga bahin sang atubang sang salakyan kag cal. 9mm pistol kag grenade launcher nga yara sa likod sang salakyan.
Sa imbestigasyon sang kapulisan, masami gid man nga naga-away ang maglive-in, kag kahapon antes magbyahe sila ang nagabaisay na.
Yara man sa sulod sang salakyan ang mga bayo sang babayi, nga gina-alegar ginapabalik sini sa balay sang anay Punong Barangay.
Ginalantaw ni Ofalia nga may-ara sang pagbaisay sa duha nga nagresulta sa pangpangluthang, bangod sa natipon nga impormasyon ang lupok ang nabatian na samtang nagadalagan pa ang salakyan.
Tubtob nga ini ang nagpahigad kag nagdulog kag nadugangan pa ang nabatian nga lupok.
Suno kay Ofalia, mahimo nga una nga naluthangan sang anay Punong Barangay ang live-in partner kag sunod sini nga ginluthang ang kaugalingon.
