39 ka bag-o nga kaso sang COVID-19 ang narekord sa ciudad sang Bacolod samtang 16 naman ka bag-o nga infections ang nagdugang sa probinsya sang Negros Occidental kahapon.
Santo sa Department of Health Region 6 case bulletin No. 149, 87 ang nagdugang nga nagpositibo sa Western Visayas kun sa diin 39 ang nagikan sa ciudad sang Bacolod, 16 sa Negros Occidental, 12 sa ciudad sang Iloilo, 10 sa probinsiya sang Iloilo, 8 sa Capiz kag tig-isa naman sa Antique kag Guimaras.
Sa mga bag-o nga kaso, duha diri ang authorized person outside residence (APOR), tig-isa ang locally stranded individual (LSI) kag returning overseas Filipino (ROF) kag 83 naman ang local cases.
Siyam naman ang nagdugang nga nag-ayo sa balatian nga ginalakipan sang isa nagikan sa Bacolod City, tatlo sa Guimaras kag lima sa Iloilo province.
May yara karon sang total recoveries ang Region 6 nga nagadangat sa 1,523.
Samtang, wala sang may narekord nga napatay bangud sa COVID-19 sa Western Visayas kahapon.
Nagapabilin sa 53 ang death toll sa rehiyon.
Sa karon, nagdangat na sa 3,448 ang kabug-usan nga kaso sa Western Visayas kun sa diin 1,872 diri ang aktibo nga kaso.
84.62% sa mga active cases ang asymptomatic.
Sa pinakaulihi nga data, nagadangat na sa 735 ang narekord nga coronavirus cases sa Bacolod kun sa diin 529 ang local cases kag 206 ang ROFs, LSIs kag APOR.
461 diri ang aktibo nga mga kaso, 257 ang nakarecover kag 17 ang nagtaliwan.
Samtang, ang probinsya sang Negros Occidental naman ang may yara sang 947 ka mga kaso sang coronavirus kun sa diin 323 diri ang local cases kag 624 naman ang ROFs, LSIs kag APOR.
