BACOLOD CITY– Padayon pa ang paglagas sang mga kapulisan sa ginaphayag riding-in-tandem nga nagpatay sa isa ka barangay kagawad sa banwa sang Pontevedra kaina sang aga.
Ang biktima nga si Salvacion Samson, 52-anyos, sang Sitio Tamsik, Barangay General Malvar, Pontevedra ang number 3 sa pito ka mga kagawad nga nagdaog sa nagligad nga barangay elections sang Mayo 14.
Sa interview sang Bombo Radyo Bacolod, ginpahayag sang live-in partner ni Samson nga si Dennis Palacios nga may yara sang gina-istorya sa cellphone ang biktima sang nagsulod sa ila balay ang mga suspek nga nakasuksok sang bonnet kag ginluthang sang makapila ka beses ang barangay kagawad, las-8:30 kaina sang aga.
Nakaangkun sang pilas sa agtang kag dughan ang biktima nga nagresulta sa iya gilayon nga kamatayon.
Gilayon man nga nagpalagyo ang mga suspek sakay sang motorsiklo.
Suno sa menor de edad nga utod ni Palacios nga kaupod ni Samson sa balay sang nagluntad ang krimen, dako ang panglawason sang duha ka suspek.
Palaligban na naman sa live-in partner kung anu ang motibo sa krimen bangud suno sa iya, wala naman sang kaangay ang barangay kagawad
