BACOLOD CITY — Nagpalab-ot sang reklamo sa Bombo Radyo ang isa ka maestro bangud nga nagapanakit na ang kaupod sini sa trabaho nga isa man ka maestra sa Paglaum Village National High School.
Ginreklamo ni Jose Ernie Buelos ang isa ka manunudlo nga si Emelyn Mercorio bangud sa masami sini nga pagpanakit sa mga co-teachers kag mga estudyante.
Suno kay Buelos nga madamo na nga mga estudyante ang nag-untat iskwela sa amo nga highschool bangud sa pagpakabubo kag pagpangyawyaw ni Mercorio.
Nagreklamo man ini bangud ginpasibangdan ni Mercorio sa pagkadula sang test paper kag ulihi lang sini nahibaluan nga wala gali sang may ginhatag nga mando ang amo nga maestra nga i-print ang ginapangita nga test paper.
Dugang pa ni Buelos nga wala ini una nga ginkonprontar ni Mercororio kag ginsugo lang ang duha ka estudyante agud magpamangkot sang test paper.
Ginpahayag man ni Buelos nga sang nagsulod na ini sa opisina sang principal agud maghikut sang iya man nga test paper, didto na kag nagsulod si Mercorio kag ginkonprontar ini sang matunog gamit ang lapel kag plastic bar.
Sang ginpanindugan sini nga wala ini nakahibalo sang test paper, nagpamuyayaw ini kag didto na kag ginhampak ini Mercorio sang makaduha ka beses sa abaga.
Ang ikaduha nga insidente suno sa tagreklamo ang natabo kahapon kun sa diin nagatindog ini sa bangga Puentebella subdivision, nagpanaog sa motor si Mercorio, ginbalikid siya sini kag ginhambalan kun diin sa makadto kag kun mag-inagi na naman ini.
Apisar nga wala ginasapak padayun sa gihapon ang pagpangyaguta nga ginahimo ni Mercorio kag gulpi lang sini ginhampak sang makapila ka beses sang payong si Buelos.
Gindepensahan naman ni Buelos ang kaugalingon kag natumba si Mercorio, ginhaboy naman sang amo nga maestra sang bato ni Buelos kag wala pa ini makunto, nagkuha ini liwat sang bato , ginpalapitan si Buelos kag didto na ginhampak liwat rason nga naigo gid sa guya ang tagreklamo.
Suno pa kay Buelos nga nagpalapit naman ini sa DepEd apang wala pa sa gihapon nahatagan sang aksyon ang pagpanakit nga ginahimo ni Emelyn Mercorio.
Bantayan ang sabat ni Mercorio sa akusasyon.
