Na-intercept sang San Carlos City Police Station ang isa ka babayi nagikan sa Cebu nga nagtabok sa ciudad sang San Carlos kag nagpa-rebond sang buhok sang Sabado, Hulyo 4.
Sa impormasyon nga nakuha sang Bombo Radyo, nagsakay sa pump boat ang babaye para makatabok kag makakadto sa Sitio Troso, Barangay Bulwangan mga alas-10:00 sang aga.
Pag-abot sa ciudad, nagpa-rebond ini dayon.
Gin-quarantine na kag natalana nga ipaidalom sa RT PCR test ang amo nga babayi kag ang lalaki nga nag-rebond sa buhok sini.
Samtang, yara man sa quarantine facility sa karon ang tatlo pa ka mga persona kag tatlo nila ka kaupdanan nga mga menor-de-edad nga na-intercept man sang kapulisan nga nagtabok sa San Carlos sakay sa pump boat padulong sa Sitio Troso.
Lakip man sa gin-quarantine kag inug-swab test ang operator sang pump boat.
Nahibaluan nga ginadumili ang pagsulod sang mga locally stranded individuals nagikan sa Region 7, Region 8 kag CARAGA Region bangud sang madamo nga mga COVID-19 cases sa amo nga mga lugar.
