Ginpaiway sang Bacolod City Police Station 3 ang pagpriso sa babayi nga ginaalegar may diperensya sa panghuna-huna kag nagpanampa sang pasahero sa public utility jeepney kag nanupla, nanipa kag nanampa man sang police nga nagabantay sa border sa atubang sang isa ka mall sa Barangay Mandalagan kaina sang udto.
Sa imbestigasyon, nagagwa nga si Ann Gomez ang pangalan sang babayi nga nagsakay sa Bata Libertad nga jeep nga kabahin sang Libre Sakay Program sang ciudad.
Sa interview sang Bombo Radyo Bacolod sa babayi nga nagasakay man sa jeep, nagsaka si Gomez sa jeep sa Bangga Pepsi kag nagdirekta pungko sa pulungkuan apang wala na sang bakante bangud sa ginbutang nga barrier.
Ginmuno ini sang isa ka pasahero nga magsocial distancing kag ginsegundahan sang driver kag ginhambalan nga sa sunod lang nga jeep masakay.
Apang nagpanagil-ot kag nagsabat si Gomez nga madugay na ang pagbantay niya sang jeep kadungan sang pagtampa sa nasambit nga pasahero.
Ginabanta sang nakasaksi nga mabaskog ang pagtampa ni Gomez sa babayi.
May una naman nga nakapanaog nga pasahero kag nagkuha sang atensyon sang enforcer agud pahibaluon angot sa natabo.
Sang nakapanaog na sa atubang sang City Mall, ginsinggitan sini ang police, gintampa kag ginduplaan.
Bangud sini, siya ang ginposasan kag gindala sa Station 3.
Samtang, gin-athag man sang station commander sang Police Station 3 nga indi mapasakaan sang kaso si Gomez.
Suno kay Police Captain Richard Fajarito, may nakakilala sa babayi nga personnel sang Bacolod City Traffic Authority Office (BTAO) kag nagkumpirmar nga buang ini.
Suno diri, wala naman sang pulos ang pagpasaka sang kaso bangud wala ini sa husto nga paminsaron kag kun pasakaan sang kaso, ang police pa ang mabutang sa kompromiso.
Ginturn-over na nila sa barangay ang babayi kag gintawgan sang anti-medicancy team.
