Nakilal-an na ang babaye nga ginapatihan ginpatay sang sapat kag nasapwan nga wala na sang kabuhi sa Purok Repolyo, Brgy Malaiba, siyudad sang Canlaon, Negros Oriental sang Abril 28.
Madumduman nga indi na makilal-an ang bangkay sang nasapwan bangud nga tul-an na lamang ini kag wala na sang nawong samtang lawas na lamang sini ang may unod.
Ini may suksok nga long sleeve (black sweatshirt) nga may blue nga inner shirt, black nga legging pants kag blue nga medyas.
Kahapon, nagpadulong si Rogelio Ligson, 39-anyos, sa estasyon sang Bombo Radyo agud tsekyaron kun ang babaye amu ang iya 18-anyos nga utod nga si Jennifer Ligson nga may deperensya sa paminsaron kag ulihi nga nakit-an sang Marso 5.
Apisar nga indi na kitaon ang nawong sang biktima, pagkakita ni Ligson sang mga bayo sini, siya ang naghibi bangud siya ang nagabakal sang bayo sang iya utod.
Sa bulig sang Bombo Radyo, nagpadulong si Rogelio sa Canlaon City kahapon sang hapon kun sa diin ginpakita diri ang litrato sang biktima kag iya ginkumpirmar nga ini ang iya utod nga si Jennifer.
Sa interview sang Bombo Radyo kay Police Lt. Col. Roland Lavisto, hepe sang Canlaon City Police Station, santo ila imbestigasyon,padulong kuntani sa Bacolod si Jennifer apang sala ang iya nasakyan nga ceres bus kag sang nagstop-over ang salakyan sa Canlaon, siya ang nanaog man.
Suno sa iya, ginpahayag sang mga residente malapit sa lugar nga luyag ni Jennifer magpadulong sa Murcia kag nagpadulong ini sa kalasangan nga bahin apisar nga ila ini ginpaandaman nga madamo sang kasapatan nga makahalalit.
Sang nasapwan ang bangkay ni Jennifer sang isa ka mangangaso, yara na ini sa advanced state of decomposition gani suno kay Lavisto, ginpalubong na ini bangud sa tuman kabaho.
Ila naman gindul-ong si Rogelio sa lulubngan sang iya utod kag wala pa nila ini naistorya sang maayo bangud siya ang nagahibi.
Suno sa hepe, nagpauli si Rogelio nga nagahilibion kag posible sa masunod nga mga inadlaw pa nila maistorya tuhoy sa proseso sang pagpasaylo sang lulubngan ni Jennifer.
