Nagapadayon ang imbestigasyon sang Bacolod City Police Station 2 angot sa pagpatay sa anay drug user nga babayi sa Purok Pilit Dos, Barangay 6, Bacolod City kahapon sang aga.
Suno kay Police Capt. Paul Vincent Pendon, commander sang Bacolod City Police Station 2, ang bangkay ang nasapwan sang nagapanguha sang tangkong agud ipakaon sa rabbit.
Ginkilala ang biktima kay Jonelyn Concepcion Aligada, 41-anyos.
Suno kay Pendon, ginpahayag sang team sang Scene of the Crime Operation (SOCO) nga may yara sila sang nakita nga 7 fired cartridge sa lugar sang insidente.
Antes pa man nasapwan ang biktima, may yara sang nabatian nga apat ka lupok ang mga kaingod sang biktima apang wala ginsapak bangud gindumdom sang mga ini nga nagikan sa birthday party.
Wala pa matumod kun sa diin ang pilas sang biktima bangud ginahulat pa ang resulta sang postmortem examination samtang ang calibre sang armas-luthang nga gingamit sa pagpatay sa biktima ang wala man matumod bangud ipaidalom pa ang cartridge sa ballistic examination.
Suno kay Pendon, si Aligada ang may yara sang ginapangatubang nga kaso sa paglapas sa RA 9165 ukon Comprehensive Dangerous Drugs Act of 2002 apang naserbehan na sini ang iya sentensya sang 2018.
Suno sa station commander sang Police Station 2, nagpatigayon sila sang buybust operation sang August 2022 kag nadakpan man ang biktima kaupod ang subject person nga si Ivan apang nadismiss man ang kaso nga ginpasaka batok diri.
