Duha ka adlaw matapos nga ini ang namissing, nasapwan nga patay kag nasulod sa sako ang lawas sang 16 anyos nga estudyante nga babayi sa syudad sang Cadiz.
Ang biktima ginkilala kay April Bacato, residente sang Sitio Sisoy, Brgy. Cabahug sa amo nga syudad kag Grade 11 student sa Villacin National High School sa Brgy. Tinampaan.
Suno sa report, nag-eskwela pa sang Biernes sang aga ang biktima apang naghalf day lamang bangod may praktice sila sang saot para sa ila night presentation sa pamaskwa sa Cadiznon.
Alas-4:00 ang takna sang hapon tapos na ang pagpractice gani nagpauli naman ang tanan.
Ginpangita sang iya mga himata ang biktima sa mga lugar kun sa diin siya mahimo nagtinir apang wala gid nakita si Bacato.
Kahapon sang aga, nakita ini sang iya mga classmate nga nasulod sa sako ang katunga sang iya lawas, wala sang panapton kag wala sang underwear.
Nagahapaon ang biktima sa higad sang sapa nga sakop sang Hda. Cornell Dos, Brgy. Cabahug syudad sang Cadiz.
Naka-bra na lamang ang biktima kag may madamo nga pilas sa iya sini nga lawas.
Sa karon, padayon pa ang imbestigasyon sang mga katapo sang kapulisan apang ginalantaw nga ginhimuslan ang biktima kag gilayon nga ginpatay.
