Patay ang isa ka babayi nga rider matapos nga nasaga-id kag nalapakan ini sang Ceres bus, Brgy Tooy Himamaylan City kahapon sang hapon.
Sa interview sang Bombo Radyo Bacolod kay P/Major Romeo Vargas, hepe sang Himamaylan City Police Station, ginpahayag sini nga pareho nga nagadalagan sa direksyon nga padulong sa ciudad sang Kabankalan ang motorsiklo nga ginadala sang biktima nga si Liamy Castor, 29-anyos kag residente sang Barangay Bantayan, Kabankalan City kag ang bus nga ginamaneho naman ni Ernesto Eliaga. 36-anyos sang Barangay Banago, Bacolod City.
Nagagwa sa imbestigasyon nga may yara sang salakyan nga nag-overtake sa biktima kag bangud nakibot ini, nagsaylo siya sa natuo nga outer lane.
Wala ini magdumdom nga maigo sang iya nga natuo nga manebela ang nawala nga bahin sang bus rason nga natumba si Castor.
Matapos matumba, nalapakan pa gid ini sang amo nga bus.
Gilayon naman nga gindala sa Himamaylan District Hospital ang biktima apang gindeklarar nga dead on arrival.
Nahibaluan nga nagikan si Castor kag ang grupo sini nga mga riders sa isa ka outreach program sa Barangay Buenavista, Himamaylan City bangud isa sila sa mga sponsors sa activity nga ginpatigayon sang Engineering Battalion sang Philippine Army kadungan sang ila nga 35th Founding Anniversary.
Sa karon, yara na sa custodial facility sang Himamaylan City Police Station ang driver sang bus para sa nagakaigo nga disposisyon.
