Babayi nga nagapanglaba, patay matapos makadanlog kag maanod sa suba sa banwa sang Murcia

Patay ang 57 anyos nga babayi matapos madanlog sa suba kag maanod sa Purok Paghimakas, Brgy Damsite, banwa sang Murcia, Negros Occidental, sang Miyerkules alas- 3:30 sang hapon.

Ang biktima ang ginkilala nga si alyas Hermie, 57 anyos, single, wala sang trabaho, kag residente sang nasambit nga lugar.

Sa interview sang Bombo Radyo kay PCapt Honey Labaro, hepe sang Murcia Municipal Police Station, nagapanglaba sa higad sang suba si Hermie sang hinali lang ini nadanlog kag nagtupa sa suba.

Suno diri, mabaskog ang daludo sang tubig amo nga naanod ini kag nalumos.

Suno kay Labaro, wala sang upod si Hermie samtang nagapanglaba kag wala man sang may nakita nga foul play sa insidente.