Patay ang isa ka babayi matapos ginluthang sang motorcycle riding-in-tandem suspects sa atubangan sang Bacolod City Police Office (BCPO) headquarters sa Magsaysay Avenue ciudad sang Bacolod takna alas-3:10 kahapon sang hapon.
Ang biktima ang ginkilala kay Crystal Faith Jastiva tumandok sang Bago City apang temporaryo karon nag nagapuyo sa ciudad sang Bacolod.
Sa interview sang Bombo Radyo Bacolod kay P/Maj. Charles Gever, hepe sang Police Station 8, nagbisita ang biktima sa iya live-in partner nga si Kirby Andrada sa BJMP antes natabo ang insidente.
Nakaangkon si Jastiva sang igo sang bala sa likod nga bahin sang iya nga ulo nga gintunaan sang iya kamatayon.
Gina-usisa pa karon sang kapulisan ang mga identification cards (IDs) nga nakuha sa posisyon ni Jastiva bangud nakabutang diri ang lain nga pangalan.
Dugang pa ni Gever, posible may kaangtanan sa iligal nga druga ang motibo sang krimen bangud ang iya live in partner nga si Andrada ang napriso matapos nadakpan sa buybust operation tinalikdan nga bulan.
Padayon pa ang imbestigasyon sang Police Station 8 agud matumod ang mga suspetsado.
