Wala pa sang suspek nga natumod ang mga kapulisan sa nagtawag sa Doña Montserrat Lopez Memorial High School nga may ginbilin ini nga bomba sa guard house.
Sa interview sang Bombo Radyo Bacolod kay Dr Warlito Rosareal, principal sang Doña Montserrat Lopez Memorial High School, wala pa sang may natumod kun sin-o ang nagtawag bangud may kabudlayan sa pag-trace bangud wala sang caller ID.
Suno kay Rosareal, makaduha ka beses nga nagtawag ang caller sa eskwelahan kun sa diin ang una ang nabaton sang registrar’s office kag namangkot kun ini ang principals office kag sang nagsabat nga indi gin-end sini ang tawag.
Nagtawag ini liwat kag ang nakasabat ang secretary sang principal kag nagpamangkot kun principals office ini kag nagsabat nga OO, diri na sini ginhambal nga may ginbilin nga bomba sa guard house.
Agud indi makatuga sang panic sa mga estudyante amat amat nga ginsaylo ang mga estudyante nga may klase malapit sa guard house kag ginpaagi sa likod nga gate kag nagdeklarar nalang sang class suspension.
Wala man ginpahibalo ang angot sa bomb threat agud nga indi magpanic ang mga estudyante.
Gilayon man nga nagtawag sang police assistance kag sang gincheck negatibo man sa bomba apang agud masiguro nag-ayo ang school principal nga iclear ang bilog nga eskwelahan gani gintawgan ang Explosive Ordnance Disposal and Canine Unit.
Sa karun clear na ang eskwelahan matapos nga wala sang nakita nga bomba.
Ini man ang una nga tion sa kasaysayan sang eskwelahan nga may nagtawag kag nagpahayag nga may ginbilin nga bomba sa eskwelahan.
Suno kay Rosareal mahimo nga luyag lang sang caller nga magtuga sang kakugmat.
