Wala pa gihapon naidentify ang babayi nga nasapwan nga nalubong sa kawayanan sa Barangay San Miguel, La Carlota City, Negros Occidental kahapon sang udto.
Sa interview sang Bombo Radyo kay Police Lt. Col. Jonel Guadalupe, hepe sang La Carlota City Police Station, posible Lunes nga adlaw sang ginlubong ang nasambit nga bangkay nga wala sang panapton kag may igo sang bala sa ulo.
Suno kay Guadalupe, wala pa sa state of decompositon ang lawas kag nakit-an sa crime scene ang bayo sini, pila ka alahas lakip na ang gold nga bracelet apang wala gid makit-an ang iya bayo nga pang-idalom.
Suno sa iya, mga 4 ukon 5 feet ang kadalumon sang duta nga ginlubngan sa biktima.
Madamo naman sang anggulo nga ginalantaw ang kapulisan lakip na ang posibilidad nga ginhimuslan ini apang suno sa iya, mas manami kun ipaidalum ini sa autopsy agud mas mahibaluan kun ano gid man ang iya kinamatyan.
