Arestado ang isa ka online seller sa ginpatigayon nga drug buybust operation sang gintingob nga pwersa sang Philippine Drug Enforcement Agency – Negros Occidental kag San Carlos City Police Station sa Ylagan Ext., Barangay 5 sa amo nga syudad.
Sa interview sang Bombo Radyo Bacolod kay PDEA Negros Occidental head Nicholas Gomez, ang suspetsado ang ginkilala kay Erlinda Palabrica, 32 anyos kag residente sang nasambit nga lugar kag isa man ka high value individual.
Nakuha sa paghinakop sang suspek ang 3 ka small kag 2 ka medium heat sealed sang suspected shabu nga may kabug-aton nga 5 grams kag nagabalor sang Php34,000.00.
Suno kay Gomez, madugay na nila nga gina-validate kag ginamonitor si Palabrica apang medyo mabudlay dakpon bangud wala ini nagapadali-dali patigayon sang transakyon.
Dugang pa ni Gomez, front lang ni Palabrica ang pagbaligya sang mga bayo kag iban pa nga kagamitan online.
Nahibaluan man nga ang pangalan ni Palabrica ang yara na sa “ISUMBONG MO KAY WILKINS” ukon sa facebook page sang Director General sang PDEA nga si Wilkins Villanueva kag madamo naman ang nagareklamo nga nabaton ang mga otoridad gikan sa mga kaingod ni Palabrica sa San Carlos bangud sa iligal sini nga buluhaton.
Nakaagi naman priso kag napasakaan sang kaso sa Republic Act 9165 ukon Comprehensive Dangerous Drugs Act of 2002 si Palabrica sang nanligad nga tuig apang nakahilway ini bangud sa plea bargaining agreement.
Ginpahayag man ni Gomez nga sikat nga drug personality si Palabrica sa San Carlos kag isa man kadako nga source nga ginakuhaan sang droga.
