Patay ang isa ka pangayaw nga babayi sa Purok Kagaykay, Barangay 2, Bacolod City matapos nga gintiro sang duha ka wala nakilal-an nga suspetsado.
Ang insidente nagluntad sang Agosto 11, kapin alas 12:20 sang kaagahon kag ang biktima ang ginkilala lamang nga si Cathy, naga-edad sang 30 anyos pasaka kag residente sang Talisay City.
Sa interview sang Bombo Radyo sa isa ka residente sa lugar nga si Rupe, si Cathy kag ang live-in partner sini nga nagatrabaho bilang gwardya ang nagarenta lamang sa area kapin duha na ka bulan.
Suno diri, ang magkalive-in masami nga nagatambay sa tyangge ilabi na si Cathy apisar kun kaagahon na.
Sadtong, kaagahon sang Agosto 11, nagakatulog si Rupe apang siya nakibot sa nabatian nga duha ka lupok.
Suno diri, ang una nga lupok mabaskog samtang ang ikaduha naman ang mahinay.
Suno kay Rupe, sa pahayag sang live-in partner ni Cathy, nagatambay sila sa tyangge kag may duha ka lalaki nga naglabay nga nakabonet kag nasambit ni Cathy nga “baw japorms ba” kag amo na nga gintiro ini.
Pagtiro sang suspek, gilayon nga nagdalagan ang live-in partner ni Cathy samtang si Cathy naman na-daplisan sang una nga tiro sa ulo, nagbalik ang live-in partner sini samtang naga-singgit sang tabang, kag amo nga gintutok sang ssupetsado sa dughan ni Cathy ang armas-luthang kag didto nga gintiro.
Pahayag ni Rupe, wala ini naggwa sang gilayon sa iya balay sa kahangawa nga yara pa sa area ang mga suspetsado.
Nag-abot man ang kapulisan apang wala na didto ang mga suspetsado.
Ila man gintsekyar ang CCTV footage sang tyangge apang indi ma-identify ang identity sang mga suspetsado.
Sa pagkilala ni Rupe sa maglive-in, sila ang maayo nga mga tawo kag naga abi-abi sa mga pumuluyo didto.
Samtang, nagapati naman ini nga ang natabo nga shootinmg incident ang may kaangtanan sa illegal nga buluhaton, ilabi na sa illegal nga druga.
