Patay ang 41- anyos nga babayi matapos ginluthang sang riding in tandem suspects sa atubang sang Negros Occidental District Jail sa Purok Province, Barangay Tabunan, Bago City, Negros Occidental, alas- 4:08 kaina sang hapon.
Ang biktima ginkilala nga si Ma. Lowela Foster, kasado kag residente sang Barangay 2, Manapla, Negros Occidental.
Sa interview sang Bombo Radyo Bacolod kay Bureau of Jail Management and Penology Negros Island Region (BJMP-NIR) Spokesperson Jail Senior Inspector Juniven Umadhay, nagabisita kada semana si Foster sa iya live-in partner nga duha ka tuig na nga napreso sa kaso may kaangtanan sa illegal nga droga.
Suno diri, nahibaloan nga may isa ka bata ang maglive-in partner.
Kaina matapos magbisita, naggwa si Foster sa district jail kaupod sanday Jojie Morales kag Lorna Mugat nga lunsay residente sang barangay Sta. Teresa, Manapla kag masakay na kun tani sa tricycle nga ila gin-arkila nga ginamaneho ni Meriam Pagatpat nga residente sang Barangay 1-A, Manapla.
Apang sang naghana nga magsaka si Foster sa tricycle, may nagpalapit nga motorsiklo sakay ang duha ka tawo.
Hinali lang nga ginluthang sang riding in tandem suspects si Foster gamit ang caliber .45 pistol kun sa diin nag-agom ini sang igo sang bala sa ulo nga nagresulta sa gilayon sini nga kamatayon.
Ang nagamaneho sang motorsiklo nagasuksuk sang yellow-gold sweatshirt samtang ang backrider naman nagasuksuk sang black T-shirt kag sila lunsay wala sang helmet apang nagasuksuk sang black nga bonnet.
Pahayag ni Umadhay magakoordinar sila sa imbestigasyon sa natabo nga krimen.
Aminado ini nga iban sa mga CCTV wala na nagagana kag nakarequest na sila sang replacement apang bukas sila nga magbulig sa imbestigasyon.
