Patay ang 52 anyos nga babayi matapos matiruhan sang iya live-in partner sang magtambag sa away sa atubang sang Cabahug Street, Brgy Zone 2, Cadiz City alas-4:00 kahapon sang kaagahon.
Ang suspect ang ginkilala nga si Robert Corbo alias Boboy Corbo, residente sang Prk Mainuswagon, Brgy Zone 2, Cadiz City samtang ang live in partner sini nga nangin biktima amo si Hydiolyn Tanaichi, 52 anyos, negosyante, residente sang Grandville Subdivision, Brgy Daga, Cadiz City.
Pilason man si John Rey Cordero, 31 anyos, solar installer kag residente sang West Proper, Brgy Zone 1, Cadiz City nga amo gid ang target sang suspect.
Sa interview sang Bombo Radyo Bacolod kay Police Lt. Lovella Cordova, deputy chief of police sang Cadiz City Police Station, naga-inom inom si Corbo kag Cordero tubtob nga sila ang nag-argumento.
Naghunos sang wala pa matumod nga armas luthang si Corbo kag gintiro si Cordero nga naigo sa lower hip area.
Samtang sang magtambag si Tanaichi, siya ang aksidente man nga natiruhan sang iya live-in partner kag naigo sa ulo.
Gindala pa ini ni Corbo sa Cadic City emergency clinic apang nadulaan gid sang kabuhi, samtang gilayon naman nga nagpalagyo ang suspect.
Suno kay Cordova, una na nga nagpahayag ang suspect nga siya ang magasurrender apang ini ang indi na macontact.
Padayun pa ang koordinasyon sang kapulisan sa pamilya agud makabulig sa pagpasungka.
Samtang ginalantaw ni Cordova nga malayo man nga magpasaka sang kaso si Cordero bangod sila ang may daan na nga engkwentro.
