Nagmando na ang alkalde sang syudad sang Bacolod nga hugton ang pagtsekyar sang mga ginabaligya nga baboy sa syudad agud nga masiguro nga indi ini kontaminado sang hog cholera.
Nahibaluan nga kapin 2500 na ang nagkalamatay nga baboy sa probinsya sang Negros Occidental bangud sa nasambit nga balatian.
Sa interview sang Bombo Radyo Bacolod kay Bacolod City Legal Officer Atty. Karlos Ting Jr., may yara naman nga daan sang nagabantay sa mga puerto sang Bacolod agud nga indi makasulod ang mga baboy ukon karne man nga kontaminado sang Swine Fever apang bangud nga naigo naman sang hog cholera ang district 3 kag 4 sa probinsya sang Negros Occidental, ginpasanyog sang mga ini ang pagbantay sa mga merkado kag satellite markets sa syudad sang Bacolod agud nga malikawan nga may magbaligya diri sang karne nga apektado sang hog cholera.
Suno diri, dapat magaagi gid sa slaughter house ang gin-ihaw nga baboy bangud may yara sang katapo sang City Veterinary Office nga nagatsekyar sang baboy antes pa man ini ihawon.
Nagpanawagan naman ini sa mga kabarangayan sa syudad sang Bacolod nga buligan sila pagtsekyar sa tagsa ka barangay nga may mga baboyan kag ipahibalo sa syudad kun may yara sang makita nga sintomas sang hog cholera agud nga mapadulong sang City Veterinary Office agud nga makuhaan sang samples kag mahibaluan kun naigo sang virus ang baboy agud man nga malikawan ang paglapta sini.
