Nagapangabay ang punong barangay sang Vista Alegre, Bacolod City nga makapagwa sang executive order si Mayor Alfredo Benitez nga hatagan sang penalidad kag pasakaan sang kaso kriminal ang mga nagahaboy sang patay nga baboy sa ciudad.
Ini matapos nasapwan sa sulod sang manhole sa Villa Angela Phase 2-B, sa nasambit nga barangay ang patay kag gina-uluran na nga baboy sang Martes sang gab-i.
Sa interview sang Bombo Radyo kay Punong Barangay Leonardo De Leon, yara na sa advanced state of decomposition ang baboy nga ginabanta naga-edad sang duha tubtob tatlo ka bulan sang nasambit sa sulod sang manhole sang Martes.
Suno kay De Leon, magluwas diri, may nakit-an man nga patay nga baktin nga naga-utaw-utaw sa Magsungaw River sang Hunyo 1.
Suno diri, siya ang nagakahangawa bangud naga-inulan sang nagliligad nga mga inadlaw kag naga-ilig ang dugo sang baboy sa tubig gani may posibilidad sang kontaminasyon.
Bangud sini, nagapagwa ini sang executive order nga nagapahugot sang pagpagwa kag pagpasulod sang baboy sa ila barangay kag nagmando nga siguruhon nga may nagakaigo nga permit ang mga baboy nga maga-agi sa slaughterhouse.
Nagapangabay man ini sa alkalde nga magpagwa sang executive order nga nagahatag sang penalty charges kag criminal case sa mga hog raisers nga napatyan sang baboy, wala nagreport kag ginhaboy lamang sa palibot.
Nagalaom ini nga maintindihan sang hog raisers nga wala sila gina-ipit kundi ginabuligan agud indi maglapta ang African Swine Fever sa ciudad.
