Nagapamatok ang Employees Union sang Bacolod City Water District (BACIWA) sa joint venture agreement sa tunga sang BACIWA kag Prime Water Inc. nga ginpirmahan sang Hulyo 17.
Nahibaluan nga ang Joint Venture Project ang magalawig sang 25 ka tuig.
Sa interview sang Bombo Radyo kay BACIWA Employees Union President Leni Espina, nagapanawagan sila nga ibasura ang nasambit nga agreement bangud ang pagpirmahanay ang ginlipod sa mga empleyado.
Suno kay Espina, antes pa man magpermahanay sang Biyernes, nagpatawag sang pamulong-pulong ang BACIWA board nahanungod sa benepisyo sang mga empleyado apang wala sila ginpahibalo nga mapermahanay na gali sang kontrata.
Suno sa presidente sang unyon, matapos mahibaluan ang tikang sang mga board members, gilayon sila nga nagpatigayon sang rally agud makapalapnag sang impormasyon sa mga pumuluyo.
Kahapon, nagpatigayon sila liwat sang protest rally kag suno sa iya, madamo sang mga konsumidor ang nakibot nga pribado na gali ang BACIWA.
Suno kay Espina, ila pa ginahibalo kun magapasaka sila sang kaso bangud nagapati ang mga ini nga indi joint venture kundi privatization ang matabo sa BACIWA.
